Kiguani Ukiuraaluit havakniqmik Ukiuqtaqtui nunai, Qitiqmiut Kuapariisiuyup Aulapkailuaqtuq Atanguyaq, John Stevenson, havaguiqtuq. Amigaitut John havaamini pijutiqaqtut agiklivalianiganik pivalianiganiklu Ukiuqtaqtumi nunami quviahuktugulu ikayuqtiriyaagani una atuqhimayuni 8-ni ukiuni!
Apiriyaqut John ilaginik apiqutinik atuqhimayaminik KC-kuni havagiamilu Ukiuqtatumi. Taugualaaqtat uqaqatiriigutivut aaliuyumi.
Qanuq naitumik uqauhiriniaraluaqiuk ukiut atuqhimayatit Qitiqmiuni?
Havakvigiyaagani Qitiqmiuni Kuapariisiuyuq COO-guvluga quvianaktuq atuqhimayara ilaliutinigilu tamaita havauhiriyatka ublumimut. Havaariyaagani havaakhatka, aturiaqaqhimayatka tamaita hivuani atuqhimayatka, atautikut akhuuqhayaunimnik ilitaamni agiyumik hunanikliqaa hivumut aulaniqmi. Quanagunaqtuq havakhimagama hivuliqhuqniganit KC-kut Ikhivautariyaanit CEO-guyumilu, David Omilgoitok, Ikhivautariyailu, Stanley Anablak, Charlie Evalik-lu.
Quviahuktuga ikayuuqtuiyutigiyamnik KC-kut aulaniqatiaqniganik. Atuqtilugu havauhira KC-kuni, timiuyuq malruiqtuqhini akituriaqhimayuq aalatqiiniklu havauhiqaliqhuni. KC-kut piyariaqaqhimayut aulaqtiriarutinik inikhanik timiuyuni havaktunik humiliqaa nunaqyuami, hilaqyuamilu. Qitiqmiut KC-kut agilrariinaqniaqtaa, manikhaqhiurutait mikiyut aulapkagauluaqtulu ikitunit agiyunik ihuaqutinik havaanit kavamanilu akiliqtuutainit. Aalatqiinik pivalianiginit talva, KC-kut ihuaqhaqtut ikayuqturiagani kihiani nahuriinagilugit Qitikmiuni manikhaqhiurutit.
Huuk atuqniqaqa amigaitqiyanik timiuyunik tikitpaliayaagani Ukiuqtatumut?
Ukpiruhuktuga amigaitut hivunikhami unipkaat Kanatami titiraqtauniaqtut ukiuqtaqtumi, ukiuqtatumilu nunani. Nunamit ihuaqutit ukualuat pijutiqatiaqniaqtut atuqniqatiaqtumik ilaujunmik Kanatamiut manikhakhiuqrutaini. Ukpiruhuktugalu Nunaqyuami ihumaluknainiga aginiaqtuq pijutauniga ukiuqtaqtumi manikhaqhiurutini atuqtukhani qulini ukiuni.
Ihumagiyakhainik piqaqit havakviuyut tikitpalianigini Ukiuqtaqtumut?
Ilitpaaliqlutit hunauniganik pivaliayaqnik. Ukiuqtaqtuq ajikutaqagitut ilitquhiqmik qanuriliurutiniklu. Ukua pivikhaqalaktut ilitaamikni uumiga ilituriniaqtut aulaniqatiaqnik ayuqnaitqiyauniaqtuq.
Ikayuqtiriigutit nunagiyauyuni havakviuyut inuilu atuqniqatiaqtuqlu. Amigaitut agiyut manikhaqhiurutinik atuqtakhat ukiuqtatumi, ila hanaviuyut kavamaniluniit havaakhijutit, pijutiqaqtut ihumagiyauluaqniginik nunagiyauyumi, Nunaqaqaqtut ilaunigit. Qitikmiut Kuapariisiuyup aulaniqatiaqniga agiyumik ikayuutauyuq aqliknaqtunik ikayuqtiriigutinik atuinaqtainik atuqhimayuni kiguliqni 25-ni ukiuni amigaitqiyanilu.
Hunauva nakuuniqhat ihumagiyakhaq pihimaviuk?
Ukiuni atuqhimayuni, ilanariyara ijuaqtaralu ihumakhaqhiuquyaagani ihumaginahuaqlugit iluumniitut. Nutaat manikhaqhiurutit ilituqhaijutiqaqpalaat, naunaipkutiniklu pijutiqaqtuqniqhutik. Atuqniqarialuaqtilugu qauyimayaaqni hunamik pivalianiqnik, ayuqnaituq ayuqnaqhiniaqniganik piqaqpalaaqat amihunik hivuniqhijutikhanik pigitaaganilu ihuaqtumik ihumaliurunmik ihuaqnigani pivikhaqaqnigani. Piqaqtuq amihunik pigiarutikhanik qauyiyaagani ilimilu ihumagiyaq una atauhiuyuq pigiarutikhaq. Ilaani hunanliqaa ihuaqtuq ila ikpiknaqmat ihuaqniganik.
Hunamik naahuriluaqit havaakhaqnik uvani tuukliuumi taiguakhami?
Upalugaiyaqtuga pinahuariamni ihumagiluaqlugit aalat pijutauyut inuujuhiqmi. Nuliara uvagalu aliahuktuguk aulariami, nahuriyaquklu takuyaagani amigaitqiyamik Kanatamik ahiiniklu ilagiyainik hilaqyuami atuqtukhani ukiuni.
Piyuamyugalu qauyimainariagani ukiuqtaqtui manikhaqhiurutauyut, ihumakhaqhiuqtiuluga, hivuliqhuqtiulugaluniit ilagini havakviuyuni katimayini Havakviuyunilu Inuit Kavamagiyani. Unikhimalaqaaqluga, utiqniarunaqhivuga havakhimaaginariamni.
Qanuriniga John
Inuuhimayuq Hivuraani Kanatami, kihiani pamiqtauhimayuq atauhiinaugitumi ukiuqtaqtumi nunagiyauyuni, John uqaqhimayuq Ukiuqtatumi Kanatami agilrariyaminik inuujuhiqmini. Havauhiqmini apqutauyumi ilaqaqtuq kivgaqtuivluni Anguhiqiyiuvluni malruukni Kanataup ukiuqtaqtuani nunagiyauyuni Qauyuitumi Auyuitumilu, havakhuni atanguyauvluni Kavamani Nunatiami, pinahuaqhunilu kivgaqturiamini havaamik kiguani agikligiaqhimayuq 15-ni avataanulu ukiuni.
Ilagit ihumagiyauluaqtut talvuuna ilaqaqtut ikayuqtuqniginik Inuit Aktunigagut Ikayuuhiakhaniklu Agiqatigiigutiqariagani agiyuni ihuaqutinik pivalianikut havaani, ikayuqhugit nunagiyauyumi manikhaqhiuqtut haavitaagani nakuuyut manikhaqhiurutikhat, ikayuqhugulu Iqaluktuutiaq piyaagani Kanatamiuni Qutiktumi Ilituqhaivikmik Havakvikhamik.
John havaqatiqatiaqtuq havakviuyunik timiuyuniklu Qitikmiuni, ukualuat Qitikmiuni Inuit Katimayiini. 2014-mi John nuuhimayut nunamut ilauliriaqhunilu Qitiqmiut Kuapariisiuyumi Aulapkailuariamini Atanguyauvluni.
Taja havaguiraluaqhuni inigiyaminit Qitiqmiut Kuapariisiuyumit COO-guvluni, John ikayuqtuqhimaaqniaqtuq KC-kunik ilainaani havaqataqluni ihumakhaqhiuqtiuluni Ikhivautalikmut.
Dino Forlin-Hivuliqhuqtiugaluaq, Havakviuyuni Nunagiyauyunilu Havaqatiriiknigini-nuuniaqtuq nutaaguliqluni COO-mi Qittiqqautijuq 1-mi 2022-mi. Hivuliqhuqtit ikayuqtiriit Qitiqmiut Kuapariisiuyumi tuniqhimainaqtut ikayuqturiagani agiklivalianigit taamakni ikayuqtapta havakviiit Qitiqmiulu nuna Nunavumi.
